股票，就好似人咁，隻隻都好撚有性格有唔同特徵。有啲好唔穩定，好緊張，又好活躍；另外又有啲係坦率，直接，同合理。一個專業炒家就會好清楚同尊重每隻股呢啲特質。市場日日都開日日麵變，射12碼黃興桂話一係入一係唔入，係市場我夠膽講個市一係升，一係跌，一係唔升唔跌。唔計收市，個股市其實唔會好似植物人咁唔識郁。雖然佢地有時磨起上來真係悶到人都癲，但個價唔會係定左喺一個價度郁都唔郁下。佢地一係向上郁少少向下郁少少，一班老散就出出入入開開心心係度炒波幅。當一隻股出現明顯走勢果陣，你會發現佢地開緊自動波咁沿住條斜路咁行。所以，喺唔同嘅條件因素影響底下，股價嘅走勢其實可以預測。
喺個走勢出現嘅初頭，你會發現成交爆升而個股價又穩步上升幾日。跟住就會發生我叫做”食飽就痾” （正常回調）呢種現象。記住，係痾，唔係賴，兩者係好撚大分別，你分唔清就搵支甘油泵試下。喺痾嘅過程中，啲成交量應該係會少過股價上升果幾日嘅，呢種食飽就痾嘅現象好正常，除非你便秘，所以無咩好驚。不過你都要打醒十二分精神留意下會唔會由痾變左賴，一賴起上來水銀瀉地係好撚唔正常嘅。
一兩日之後，你會發現個股價又開始上返去而啲成交又升返。如果個升勢係堅嘅，你會發現好快就上返去食飽就痾之前個價，然後再創新高。呢一輪升勢應該又會持續幾日，然後升到咁上下，又係時候痾啦，但痾得來個價唔應該跌穿一路升上來果條軌跡。唔明？食兩碗飯痾一督茄，食三碗飯痾兩督，食四碗如果痾三督就叫好有軌跡，唔好食四碗變左痾五、六督。喺呢啲咁堅嘅升勢初頭可能你會見每次股價創新高都唔算高之前個價好多，但去到升勢嘅尾段你會見佢已經擺脫左地心吸力。
等我拎 QQ 做例子講解下。2017年第1，2季佢由年頭慢慢儲氣升破2016年頂，個升勢就開始左一直去到300蚊前呢個心理關口佢痾左一野。不過好快，佢就升穿左300蚊，兩三下手勢就升多10%俾你睇再慢慢磨下痾下。放底兩舊又儲夠氣，佢就進入升空環節爆兩野就上埋430蚊先痾一痾。所以你見啦，次次痾完一次佢儲夠力就愈爆愈有力，去到尾段你見佢已經擺脫左地心吸力。當佢再好勇咁係2018年頭升穿前頂，按以前路徑應該都500蚊前先痾啦係咪？點知佢470蚊就停左係度要痾。痾完想再起步，又居然未挑戰到前頂又要痾。係呢個時候你就要驚佢由痾變做賴喇！點解？因為成件事唔對路囉。當個市場唔係跟足佢以往咁行，一定係有野發生，你唔好理係發生乜野事，總之係唔對路，係呢個時候就係一個好撚鳩柒危險嘅訊號。當你見到呢個危險訊號，你就應該要跳船唔好再同佢癲。
或者你會問點解我見到少少唔對路就淆底咁廢，但我同你講，如果你喺台灣九份好撚型咁行緊條火車軌，失驚無神有架火車開緊過黎，我絕對唔會戇鳩到話無事嘅繼續行。跳一跳軌，當睇定知道無事果陣我隨時可以上返條軌繼續行。
一般老散點解會係市場損手？唔夠果斷囉。明明睇住有架火車撞緊過黎，都仲係要覺得睇定少少先，希望架車咁岩係你面前停低再調頭，技術性回調姐嚇我唔到。到市場升返少少俾個位佢走，佢又話而家乜事都無啦仲唔同我爆上太空 gogogo。懷著希望去炒股，多數都係失望收場。如果一開始佢地見到危機就立即跳船，保得住個屎忽之外仲唔洗日日擔驚受怕。
講左咁耐，我想重申一點：炒野係睇眼前，要 fing 撚開晒所有個人主觀希望，無人可以當個市場係 ATM 日日去拎錢。一年可能淨係得幾次機會值得你入市，其他時間你應該等有勢出現。如果你睇個時機睇得準，你一落注就已經會有盈利，係果一刻你要做嘅就係留意有無出現危險訊號，有就跳船，無就繼續坐，盈利會好好咁自己照顧自己。當班老散日日炒出炒入爬格仔，好似日日都有錢執好有型果陣你應該笑而不語，因為你知道就係呢班蛋散向市場提供流動性，令到李小加有工返，你唯一要做嘅就係等個市爆邊果陣你就可以輕鬆食大茶飯。
第二章 ‧ 未完待續……
Comments