我過往嘅經驗證明左一樣野：喺投機當中真正賺撚到錢嘅都係來自果啲一開倉就有浮盈嘅膠液。
喺我之後會講嘅膠液操作過程當中，你會發現我落親場都係喺心理關鍵毛文（Moment），即係當個市好撚勁咁行緊一個方向，勁撚到宇宙最強甄子丹都無辦法令個市停低果陣。個市咁撚勁當然唔係我嘅操作又或者我勁到連丹爺都淆撚晒大底啦，而係喺背後推動個市行嘅勢力強到佢唔行唔得，情況咪好似颶風山竹吹襲緊香港果陣，你想行街但佢就吹到你仆街囉。
以前我都試過好撚多次好似其他炒家同老散咁，成日都想有倉喺手，無心機等到個市出訊號就出手。你可能會問：「澤西哥你咁撚神都會狗衝？」屌！知唔知咩係神呀？神以前都係人不過佢做到人做唔到嘅野之後佢就係神。不過其實你又知唔知大部份人會做嘅野，神耐唔時都會做下嘅。好似老散一樣，我間中都會放縰自己去狗衝，結果係點？咪柒囉，未聽過狗衝出來柒呀？
投機呢個遊戲就好似其他遊戲咁，我地個撚個都有同一個問題，就係鋪鋪都想玩，鋪鋪都想贏。呢個問題成為左所有投機者嘅最大敵人，如果唔好好控制呢樣野，呢個遊戲最終會收你皮。另一方面，又要威又要帶頭盔係人之常情來，不過如果你將你嘅貪心同淆底帶入投機呢個遊戲入面，你會好撚大鑊，好撚容易混淆左兩樣野，例如覺得＄470蚊嘅股王QQ好撚抵，$270蚊嘅QQ淆撚晒底。
驚你唔撚明，我再舉個例子：假設你喺＄30蚊買左隻股票，第二日佢升到上去＄32，你即刻開始有啲淆底，覺得有食唔食罪大惡極，好撚驚第三日個股價就會跌返落去，所以你就急急腳＄32蚊賣左出去，袋袋平安果$2蚊利潤覺得好撚爽。但其實隻股啱啱先開始升，點解你唔貪心啲？點撚解你咁驚唔食就會無左果＄2浮盈？果$2浮盈本身都唔屬於你架啦。即係咁，好似你溝緊個女神，第二日人地同你影左張合照你就好撚心滿意足，拎住張相日日J就夠，從此唔再溝佢，因為你驚最終溝唔掂連張合照都比佢撕爛埋？有無諗過佢今日肯同你影相，第日就比你拖手甚至打車輪？既然隻股一日可以升＄2, 佢就有本事再升幾蚊甚至幾十蚊，只要隻股同個市嘅走勢正路，你洗乜驚死食唔切？隻股個走勢已經證明你開倉係啱，如果唔係你根本唔會有浮盈啦，所以只要個市嘅走勢正路，你大可以當佢屁股咁坐實，可能佢會升到你大叫唔好……停。
另一方面，如果你喺$30買完隻股之後，佢第二日就插落$28，你同自己講，無事嘅，幻覺來嘅啫，嚇我唔到嘅，曾淵滄博士（震完倉搏上）！其實咁樣一來就插成7%就正正係你應該淆底嘅時候，因為今日可以插$2蚊，他日就可以插$20蚊。所以呢啲正正係你應該淆撚晒大底，狠心止蝕嘅時候，主動止蝕來保存淨低果$28蚊，而唔係等到輸到仆街冚家鏟泥齊種樹果陣就燒數簿都無用。
賺緊錢嘅倉唔撚洗你去攪佢嘅，要攪就攪你輸緊錢嘅倉啦。投機者一定要學識拎得起放得低，輸少當贏，留得青山在那怕無柴燒。正所謂有本未為輸，我輸故我贏，只要保存到本金，機會來嘅時候一樣可以大翻身。唔識輸嘅投機者，最終會輸到HIHI，無晒本金，他日就算有黃金機會，都無能力開倉去贏。
我想強調一下，個市總會有絕佳嘅有機會出現，而我相信任何流住投機血液同有耐性嘅人，都會有一套獨特嘅方法去判斷個市啱唔啱炒同埋咩時候應該落場。成功嘅投機從來都唔係斷鳩估。想持續咁進行成功嘅投機，你一定要有一套方法。一啲我用嘅方法可能對某啲人來講係無撚用，咩奶油？點解我果套咁緊揪嘅方法唔撚啱你用？奶油係呢個世界無100%準嘅方法。用我自己果套方法果陣，我好撚清楚中伏機會大唔大。當個市個走勢有啲不似預期唔撚對路，我就會即刻止蝕離場。可能幾日之後，我個方法又指出係時候入市，咁我就會再開返倉，但就算咁都唔代表今次一定中中中。
好撚多炒家鍾意睇圖炒市，無可厚非，起碼佢地都叫做有睇過下圖。但我想講，淨係睇圖係無用，因為個重點根本就唔係張陰陽燭度，而係要自己做記錄。老老柒柒，我自己炒野就從來無睇圖表，因為我覺得張圖過山車咁上上落落好柒煩，又容易影響我思路，所以我係用我自己方法去記錄低個市每日個走勢。究竟點先叫做正確？我鳩知咩，啱用就得啦屌！要創造一個屬於自己嘅膠液訊號，你就要自己俾心機同時間去研究價格嘅走勢，最終你就會創出一套啱佢自己嘅方法來幫你出入市。喺呢本書入面我會講下一啲我覺得喺我嘅投機操作上面有用嘅野。比心機留意下啲股票同個市點行，只要將價格同時間要素完美咁結合，你好快可以大叫：「機會來啦，飛雲！」
喺呢本書入面，我會指出有咩係投機大忌。其中一條好撚大鑊嘅禁忌係你千其唔好將投機當撚左投資，或者將投資當撚左投機。果班友炒野炒到短炒變長渣就最撚戇鳩。你一定成撚日聽到啲柒頭講：「挑，我一啲都唔驚個市跌成點，比人CALL孖展我未撚淆過，因為我從來都係唔係投機。我係價值投資派大弟子，我買股票係做長線嘅，就算佢地點跌都好，最後都會回歸價值嘅。」好不幸地，好多時呢堆當日好有價值嘅股票後尾都會瀨晒野，股價同投資者個荷包一樣不斷縮水，甚至停埋牌。呢啲情況好多時都係因為呢啲價值投資所謂嘅價值，係根據一啲過去嘅資料，或者一啲19財演吹嘅無限憧憬。喺呢堆投資者醒覺過去不代表將來、將來又變成鳩吹之前，股價一早已經跌到一仆一碌。就算係所謂嘅價值投資，都要諗辦法小心保存自己嘅資本，唔好將價值投資變左仆直投資。
我諗你都好撚清楚，曾經有幾多有買貴無買錯嘅明星股，例如昔日嘅思捷環球，2007年最高價成＄120, 而家呢？＄2！！！屌，我無撚寫錯你無撚眼花！係兩蚊雞！另一隻香港情誼匯豐控股，2017最高＄140，而家唔夠＄70，銀行唔係好穩陣架咩？帽事嘅，你未聽過啫，有樣野叫零成本收息大法，匯豐派咁高息，一早零成本啦。當年＄140派5厘息，今日＄70派6厘添呀！嗯，＄140*5%＝＄7, ＄70*6%＝＄4.2，肯撚定係賺左啦。呢啲都過左去，重提來做乜，咁近年嘅金沙銀娛、瑞聲科技、舜宇光學同埋騰訊呢？幾多安全同保守嘅價值投資者嘅身家隨著呢堆股王沉淪。投機者當然都會喺市場上輸錢，但我深信投機所輸嘅錢比起所謂「價值」投資所輸嘅錢根本係的士(Taxi) 同賓士(Benz) 比。
對我來講，所謂「價值」投資果啲人先係最大嘅賭徒。佢地落左注，死坐，如果真係錯撚左，硬食，正股可守怕咩啫？投機果班友呢？可能係同一時間買入，但只要佢係一個真正嘅投機者，當佢發現唔對路，就會即刻斬纜，輸少當贏，等下次啱嘅機會再出手。
當一隻股票要跌果真陣，無人可以知道邊到係底。相反，當一隻股票要升果陣，亦無人可以知道邊到係天花板。有一樣野你一定要記撚住，千其咪見一隻股票升到好高就沽鳩佢！你可能見佢由＄10升到＄50就覺得佢升到離撚晒大嫂，但其實呢個時候你應該諗下有無野會阻止佢再由＄50爆上＄150，盈喜又好發哥做主席又好，要升嘅話乜柒理由都可以升。太多柒頭自以為睇通個市覺得升左咁多無奶油唔跌就走去造淡，結果個市未跌佢嘅本金就係咁跌，然後不斷鳩叫連個天都唔鍾意佢大戶係又係咁挾鳩佢。
相反啦，亦唔好諗住隻股票喺高位跌左好撚多就隨便走去撈底。股價跌嘅背後總有佢嘅原因，就算佢睇落去係跌左好多，過幾日望返今日嘅價可能重係好高，即係低處未算低。忘記佢之前個價有幾高同埋佢跌左幾多啦，思捷由＄120咁高跌到落$20夠無得輸啦，最後跌多9成夠伏未？
我諗好多人知道我投機嘅方法之後都變左驚奇隊長，因為我嘅方法好簡單：就係當一隻股票係行緊上升趨勢，我會等佢回調完再創新高之後即刻狗衝，相反造淡的話亦係等佢反彈完再破底之後就沽柒佢，點解？因為勢不可擋。乜春轉勢日，五行八卦果堆，我識條鐵，我食勢唔食轉角位。所以我絕對唔會喺股價回調果時買入，或者喺反彈果時造淡。
另一樣你要記撚住嘅野就係，當你第一注已經輸緊錢果陣，唔好戇鳩鳩咁開第二注，即係加注。千其唔好諗住溝淡！明明第一注已經柒左，溝淡即係唔認錯，柒上加柒只會變成柒柒柒（777)。溝＝柒，同我刻住呢樣野喺你個額頭度。
第一章完 ‧ 待續……
Comments